Сваю частку адметнасці краю дэманструе экспазіцыйны раздзел “Хата – сусвет беларуса”, які аднаўляе жыццё і побыт нашых продкаў. Тут сабраны жаночае і мужчынскае адзенне, вышываныя рушнікі, настольніцы, прасціны, саматканыя коўдры, посуд, мэбля, прылады працы. Тут наведвальнікам ёсць магчымасць зразумець пэўныя побытавыя, сямейныя традыцыі. Для таго, каб скласці цэласнае ўяўленне пра культуру і быт рэгіёна, прапануюцца экспанаты пра народныя промыслы і рамёствы, штодзённае жыццё сялян.
Па экспазіцыі “Гісторыя школы” можна прасачыць станаўленне і развіццё адукацыі ад XIX ст. да нашых дзён у вёсцы Залессе і ў мікрараёне школы. Тут у храналагічным парадку паказана з’яўленне і далейшае развіццё школьнай адукацыі, а таксама дасягненні сучаснай школы.
Адна з найбуйнейшых экспазіцый “Залессе ў гады Вялікай Айчыннай вайны” знаёміць наведвальнікаў з ветэранамі і ўдзельнікамі ВАВ, салдацкімі ўдовамі, жыхарамі вёскі загінуўшымі ў гады вайны. Змест гэтай экспазіцыі дапаўняюць узнагароды, копіі і арыгіналы дакументаў ветэранаў ВАВ, салдацкія рэчы.
